Institute of Artivism in Kosova është një institut i ngritur mbi idenë e konceptit filozofik të " artivizmit", një pikëpamje që përbashkon krijimtaritë e artistëve dhe artisteve me aktivizmin shoqëror. Figura e artivistit/es , është ajo e një artisti/eje, aktivisti/eje, e krahasueshme me atë të intelektualit dhe intelektuales së angazhuar. Misioni i Institute of Artivism in Kosova është të kultivojë kulturën e artivizmit në Kosovë, në atë mënyrë që krijimtaria artistike dhe eventet kulturore, të ekspozohen dhe të vendosen në publik edhe në formë të aktivizmit shoqëror, si reagim, si kritikë, si aksion politik, si nxitje dhe zhvillim debatesh dhe si interaktivitet në shoqëri.

Institute of Artivism in Kosova është themeluar dhe jetësuar nga artistë dhe studiues të artit, të cilët janë bashkuar rreth idesë së përkthimit të artit në aktivizëm , përtej shijeve estetike dhe mediumeve artistike. Qëllimi i këtij misioni që anëtarët/et e Institute of Artivism in Kosova i kanë vënë këtij enti përmes vetës së tyre, është gjallërimi i jetës kulturore dhe i debateve sociale në Kosovë, duke e shndërruar këtë institut në një platformë për ekspozita dhe instalacione arti, për performanca, shfaqje teatrale, hapësirë për krijimtari artistike, për promovime publikimesh, si dhe botime tekstesh të lidhura me artin dhe kulturën.

I vendosur me qendër në Prishtinë, Institute of Artivism in Kosova synon të ofrojë mundësi për të shprehur kreativitetin e tyre artistik artistët/et e rinj/reja dhe studentët/et e artit, grupet e artistëve/eve dhe shoqatat e profilizuara për kulturë, organizatat joqeveritare që organizojnë evente promovuese dhe debatuese, si dhe persona e entitete të shoqërisë civile që avokojnë për ngritjen e nivelit të demokracisë, drejtësisë sociale, barazisë gjinore dhe të drejtave të njeriut , përmes avokimit dhe aktivizmit artistik dhe kulturor.